முதிர்ந்த உயிர்

தொலைபேசி அலறும்
போதெல்லாம் நடுங்கும் கைகள்.

வீட்டு ஆண்களின் சத்தம்
உயரும் கணம் ஏதோ
முனகி அடங்கும் உதடுகள்.

பின்னிரவில் வீறிட்டு அழுகின்ற
குழந்தைகளுக்காய்
பிராத்தனைகளில் மூழ்கும் மனம்.

அறை கடக்கும்
நிழல்களின் பின்னோடி திரும்பும்
அழுக்கற்ற நேசம்.

வாழ்வின் அந்தியில்
நாட்கள் நகர்த்தும்
வீட்டின் முதிர்ந்த உயிரை
மூத்திரவாடை பாட்டி
என்கிறோம் நாம்.