நத்தையுடன் கழிந்த பொழுதுகள்

முதலில் அது நத்தை என்றே
எண்ணியிருந்தேன்.
பின்
சிறகுகள்
முளைக்கத்துவங்கியபோது
பட்டாம்பூச்சியோ என்று வியந்தேன்
ஆனால் அதுவொரு
சிட்டுக்குருவியை போலிருந்தது.
அறைக்குள் அங்குமிங்கும்
பறந்து
வினோத ஒலியெழுப்பியபடி
இருந்தது.
சற்று நேரத்தில் அறையெங்கும்
அதன் எச்சத்தால் நிரப்பிவிட்டு
கூரையை பிய்த்து எறிந்து பறந்து சென்றது.
இப்படித்தான் நிகழ்ந்தது உன்
வருகையும்
இருத்தலும்
பிரிதலும்.